每次要開始做嘢，就會開啟拖延模式：坐喺檯前，明明諗好要做乜，但寫兩行字又刪返，發陣呆又撳去睇下IG。最後乜都冇做到，仲要俾心裡面把聲鬧到自己飛起：「你真係好廢，咁簡單嘅事都做唔好！」
慢慢察覺到，原來自己不知不覺將件事諗得太「重」。好似上次要寫文，未開始就已經諗：「今次一定要寫好，唔可以好似上次咁求其」、「如果寫得唔好，實會被人笑」⋯⋯結果？件事重到好似揹住舊石頭，連開始嘅勇氣都冇咗。我發現自己成日有個諗法：「做唔到完美，寧願唔開始」，成件事就卡住咗。
直到我同自己講咗個魔法咒語——「做個垃圾出來先」！每次卡住，就同自己講：「不論點樣，整件垃圾出嚟先」，真係即刻成個人鬆咗。寫第一句唔使再驚寫得唔好，做運動唔使再逼自己一次過跑足五公里。原來容許自己做唔好，先係做好嘅開始。